Kalol Samachar

કલોલમાં પોલીસ મોટા બુટલેગરોને પકડતી નથી પરંતુ નાના ખેપિયાઓ જ્યાં દેખાય ત્યાંથી પકડી લેતી હોય છે. આજે આવો જ એક કિસ્સો નોંધાયો છે. બનાવની વિગતો અનુસાર પોલીસ આંબેડકર ત્રણ રસ્તા ખાતે પેટ્રોલિંગમાં હતી ત્યારે બાતમી મળી હતી કે અડાલજ તરફથી એક પલ્સર બાઈક પર દેશી દારૂ આવી રહ્યો છે. જેથી પોલીસે સાબદી બનીને વોચ ગોઠવી હતી, બાઇકસવાર જેવો આવ્યો તેવો જ પોલીસે દબોચી લીધો હતો.

આ બાદ પોલીસે પુછપરછ કરતા ખેપીયાએ પોતાનું નામ રાકેશજી વિષ્ણુજી ઠાકોર જણાવ્યું હતું. અને તે ટિંટોડા ઠાકોરવાસમાં રહે છે. પોલીસે બાઈકની તપાસ કરતા તેમાં 200 રૂપિયાની કિંમતનો દેશી દારૂ મળી આવ્યો હતો.જેથી પોલીસે દેશી દારૂ જપ્ત કરી લીધો હતો તેમજ વીસ હજાર રૂપિયાના પલ્સર બાઈકને જપ્ત કરી લીધું હતું.

બીજી તરફ કલોલ બજારમાં આવેલ ખમાર ભુવન આગળ એક વ્યક્તિ પીધેલી હાલતમાં એક્ટિવા ચલાવતો નજરે ચડતા પોલીસે કાયદેસરની કાર્યવાહી કરી હતી. ચેકીંગ દરમિયાન વ્યક્તિ એક્ટિવા પર હાલકડોલક થતો આવતો હતો જેને કારણે પોલીસને શંકા જતા તેની અટકાયત કરી કાયદેસરની કાર્યવાહી કરી હતી.