કલોલના બીવીએમ ફાટક પર કોન્ટ્રાક્ટરની બેદરકારીથી અકસ્માતનો ભય
કલોલમાં બીવીએમ ફાટક પર રેલવે ઓવરબ્રિજ બનાવતા કોન્ટ્રાકટરની બેદરકારી સામે આવી કલોલ: કલોલ શહેરના બીવીએમ ફાટક ખાતે રેલવે ઓવરબ્રિજનું નિર્માણ કાર્ય ચાલી રહ્યું છે, પરંતુ કોન્ટ્રાકટરની બેદરકારીને કારણે સ્થાનિક વાહન ચાલકોને ભારે હાલાકીનો સામનો કરવો પડી રહ્યો છે. ફાટક પર રસ્તો રોકીને ખિલાસળી સહિતનો બાંધકામનો સામાન મૂકી દેવાયો છે, જેના કારણે રસ્તો સાંકડો થઈ ગયો છે. આની અસર ખાસ કરીને ફાટક બંધ હોય ત્યારે જોવા મળે છે, જ્યારે વાહન ચાલકોને લાંબી કતારો અને અગવડનો સામનો કરવો પડે છે.
વરસાદની ઋતુમાં આ સ્થિતિ વધુ ગંભીર બને છે, કારણ કે ફાટક પાસે જોરદાર ટ્રાફિક જામ થઈ જાય છે. આ ઉપરાંત, રથયાત્રા દરમિયાન મોટા વાહનોને રોકવા માટે લગાવેલા થાંભલાઓ હટાવી દેવામાં આવ્યા હતા, પરંતુ હવે તેની જગ્યાએ અવ્યવસ્થિત રીતે સળિયા ઉભા કરી દેવાયા છે. આ સળિયા નિયમિત અંતરે અને યોગ્ય રીતે ન લગાવાતાં વાહન ચાલકોને ઇજા થવાનો અને અકસ્માતનો ભય રહેલો છે.
સ્થાનિક લોકો અને વાહન ચાલકોએ આ મામલે રોષ વ્યક્ત કર્યો છે અને ચોમાસાની ઋતુ દરમિયાન બીવીએમ ફાટકને તમામ પ્રકારના વાહનો માટે ખુલ્લું રાખવાની માગણી કરી છે. આ ઉપરાંત, કોન્ટ્રાકટરની બેદરકારી અને અવ્યવસ્થિત બાંધકામ સામગ્રીના સંચાલનને લઈને સ્થાનિક વહીવટી તંત્ર પાસે ઝડપી પગલાં લેવાની માંગ ઉઠી છે. જો આ બાબતે તાત્કાલિક કાર્યવાહી નહીં કરવામાં આવે તો ભવિષ્યમાં ગંભીર અકસ્માતોની શક્યતા નકારી શકાય નહીં.
સ્થાનિક રહેવાસીઓએ જણાવ્યું કે, “આવી બેદરકારીથી રોજિંદા જીવન પર અસર પડે છે અને ખાસ કરીને વરસાદના દિવસોમાં પરિસ્થિતિ અસહ્ય બની જાય છે.” નગરપાલિકા અને રેલવે વિભાગે આ ફાટક પરની સમસ્યાને ઉકેલવા માટે તાત્કાલિક ધ્યાન આપવું જોઈએ, જેથી વાહન ચાલકો અને રાહદારીઓની સલામતી સુનિશ્ચિત થઈ શકે.