જીજ્ઞેશ મેવાણીએ ભાજપના ધારાસભ્યને કહ્યું : હું જોટાણાના મરચા કરતા પણ વધુ તીખો છું
મહેસાણાના જોટાણામાં કોંગ્રેસના ધારાસભ્ય જીજ્ઞેશ મેવાણી અને ભાજપના ધારાસભ્ય કરસન સોલંકી સામસામે આવી ગયા હતા. મેવાણીએ એક તબક્કે તો કહી દીધું હતું કે હું જોટાણાના મરચા પણ પણ વધારે તીખો છું.
વાત જાણે એમ છે કે મહેસાણા પાસે આવેલ જોટાણા ગામમાં બાબા સાહેબ આંબેડકરની પ્રતિમા અનાવરણન પ્રસંગ હતો. ભાજપ અને કોંગ્રેસના નેતાઓને તેડું હતું. કાર્યક્રમ દરમિયાન મેવાણીનો ભાષણ આપવાનો વારો આવ્યો. મેવાણીએ ભાષણમાં સરકારની ટીકા કરી, સફાઈ કામદારોના મોતનો પ્રશ્ન ઉઠાવ્યો હતો. સ્વાભાવિક છે કકે ત્યાં હાજર રહેલા ભાજપના ધારાસભ્યને આ વાત પસંદ ન આવે. જેથી તેમણે બેઠક પરથી ઉભા થઇ અધવચ્ચે ભાષણ રોકતા આ પ્રકારની વાતો ન કરવા કહ્યું હતું.
જેને પગલે જીજ્ઞેશ મેવાણી સમર્થકો અને ભાજપ સમર્થકો સામસામે આવી ગયા હતા. નોંધનીય છે કે જોટાણા તેના મરચા માટે પ્રખ્યાત છે. ત્યારે જોટાણાની ધરતી પર મેવાણીએ કરસન સોલંકીને રોકડો જવાબ આપતા કહ્યું હતું કે હું તો જોટાણાના મરચા કરતાય વધુ તીખો છું.