કલોલ નગરપાલિકામાં ચીફ ઓફિસર તેમની પ્રથમ ટર્મની માફક બીજી ટર્મમાં પણ વિવાદોથી પીછો છોડાવી શક્યા નથી. કલોલ નગરપાલિકાના ચીફ ઓફિસરે તેમનો સરકારી નંબર બંધ કરીને ખાનગી મોબાઈલ નંબર વાપરતા જાગૃત નાગરિકે ઉચ્ચ કક્ષાએ અરજી કરી હતી, જેને પગલે ચીફ ઓફિસરે સરકારી નંબર ચાલુ કરવાની ફરજ પડી છે.
કલોલ નગરપાલિકાના કર્મચારીઓ પાસે સરકારી મોબાઈલ નંબર છે. આ નંબર પબ્લિક ડોમેઈનમાં હોવાથી નાગરિકો તેમની કોઈપણ ફરિયાદને લઈને મોબાઈલ પર રજુઆત કરી શકે છે. કલોલ નગરપાલિકાના અગાઉના ચીફ ઓફિસરે પોતાનો સરકારી નંબર ચાલુ રાખ્યો હતો. જોકે દિવાળી અગાઉ તેમની બદલી થઇ હતી અને અગાઉ ફરજ બજાવી ચૂકેલા નવા ચીફ ઓફિસર આવ્યા હતા. જોકે તેમણે સરકારી નંબર વાપરવાને બદલે પોતાનો ખાનગી મોબાઈલ નંબર વાપરવાનું મુનાસિબ માન્યું હતું. સરકારી નંબર બંધ હોવાથી લોકોને રજુઆત કરવામાં અનેક મુશ્કેલીઓનો સામનો કરવો પડતો હતો.
કલોલના એક જાગૃત નાગરિક દ્વારા સીઓના બંધ સરકારી નંબરને લઈને મુખ્યમંત્રી કાર્યાલય સુધી રજુઆત કરવામાં આવી હતી. અરજદારે જણાવ્યું હતું કે કલોલ નગરપાલિકા દ્વારા સરકારી નંબરને લઈને આશરે 2.50 લાખ રૂપિયા ખર્ચ કરવામાં આવે છે જે પ્રજાના ટેક્સમાંથી વસુલાતા હોય છે. આ સંજોગોમાં ચીફ ઓફિસરનો નંબર ચાલુ કરાવામાં આવે. જેને પગલે ઉચ્ચ કક્ષાએથી આદેશ આવતા કલોલ નગરપાલિકાના ચિફ ઓફિસરનો સરકારી મોબાઈલ નંબર ચાલુ કરવામાં આવ્યો હતો.