કલોલ: છત્રાલ જિલ્લા અને તાલુકા પંચાયત બેઠક માટે ‘આપ’ના ઉમેદવાર જાહેર
ગુજરાતમાં આગામી સ્થાનિક સ્વરાજ્યની ચૂંટણીઓને લઈને રાજકીય ગરમાવો તેજ બન્યો છે, ત્યારે કલોલ પંથકમાં આમ આદમી પાર્ટીએ અન્ય પક્ષો કરતા વહેલા ઉમેદવારો જાહેર કરીને મેદાન મારી લીધું છે. આમ આદમી પાર્ટી દ્વારા કલોલની છત્રાલ જિલ્લા પંચાયત અને તાલુકા પંચાયતની બેઠકો માટે સત્તાવાર રીતે ઉમેદવારોના નામની જાહેરાત કરવામાં આવી છે.
આ જાહેરાત મુજબ, છત્રાલ જિલ્લા પંચાયતની બેઠક પરથી પક્ષે પાર્વતીબેન પ્રવીણભાઈ પરમાર પર પસંદગીનો કળશ ઢોળ્યો છે. જ્યારે છત્રાલ-1 તાલુકા પંચાયતની બેઠક માટે પ્રવીણકુમાર તપોધનને ચૂંટણીના મેદાનમાં ઉતારવામાં આવ્યા છે. ‘આપ’ દ્વારા લેવાયેલા આ નિર્ણયથી સ્થાનિક રાજકારણમાં ચર્ચાઓ જાગી છે.
રાજકીય વિશ્લેષકોનું માનવું છે કે, ચૂંટણીના ઘણા સમય પહેલા જ ઉમેદવારોના નામ જાહેર કરી દેવાથી આમ આદમી પાર્ટીને પ્રચાર-પ્રસારમાં મોટો ફાયદો મળી શકે છે. વહેલી જાહેરાતને કારણે ઉમેદવારોને મતદારો સુધી પહોંચવા અને પક્ષની વિચારધારા લોકો સુધી પહોંચાડવા માટે પૂરતો સમય મળશે. આમ, કલોલ પંથકમાં આમ આદમી પાર્ટીએ અત્યારથી જ મજબૂત ચૂંટણી તૈયારીઓ શરૂ કરી દીધી હોય તેવું સ્પષ્ટપણે દેખાઈ રહ્યું છે.